ماهو Wps

0 9
wps
wps

شرح معني الwps

لو ركزت في أي راوتر أو معظم الـ Routers عموماً هتلاقي زرار هيجننك و نفسك تعرف دة بيعمل ايه مكتوب عليه WPS زي ما أنت شايف في تاني صورة كدة
مبدئياً اصلاً #WPS دي اختصار ايه اساساً !!!
– دي يا عم اختصار لـ Wifi Protected Setup
= مش فاهمك بردو طب ما أنا حاطط Password للـ Wifi بتاعي و Protected بردو … ايه لازمة الزرار دة مش فاهمك بردو 😀 😀
– بص يا سيدي دي تقنية بتبقى موجودة في الرواتر و مبتشتغلش غير مع WPA أو WPA2 بس
و قبل ما تسألني ايه WPA دي ، دي نظام التشفير لكلمة السر بتاعة الـ WIFI بتاعك.
– التقنية دي بتسمحلك أنك تربط الأجهزة بالراوتر بطريقة أسرع ، تقدر تعتبرها حاجة كدة زي لما تربط موبايلين ببعض بالـ Bluetooth أو بالـ NFC.
= طب ازاي الموضوع دة بيتم !!
– في كذا طريقة … تعالى نمسكهم واحدة … واحدة :
1- هتدوس على زرار الـ WPS اللي في الراوتر بتاعك عشان يبدأ يعمل استكشاف للأجهزة اللي فيها WPS اللي حواليه و بعدين هتروح للابتوب بتاعك أو موبايل أو أي كان الجهاز اللي أنت عايز تربطه بشبكة الانترنت بتاعة الراوتر و تختار اسم الشبكة من الجهاز دة و هو هيدخلك على الشبكة على طول من غير ما يطلب منك كلمة سر ولا أي حاجة 😀
* مش لازم يكون الجهاز بتاعك دة لابتوب أو موبايل … ممكن تكون طباعة أو “wireless range extenders” و فيها بردو زرار WPS فتبدأ تضغط الزرار اللي في الجهاز و الزرار اللي في الراوتر ، فيبدأ الراوتر يبعت للجهاز دة كلمة السر و يتم توصيل الجهاز بالشبكة اوتوماتيك و بكل بساطة ، و يبدأ الجهاز دة يحفظ الشبكة دي عنده بحيث ان مش كل مرة تفتح فيها الجهاز لازم تدورس فيها على زرار الـ WPS تاني.
2- الطريقة دي بتعتمد على 8 أرقام ” Pin Code ” بتتولد اوتوماتيك من الراوتر بتستخدمها لما تيجي تربط الراوتر بجهاز بيدعم الـ WPS بس مش فيه الزرار دة ، فـ بتبدأ تدخل على صفحة الراوتر و تاخد منه الكود المتولد و تدخله في الجهاز Manually و بكدة تكون ربطهم ببعض
3- هنا الطريقة مشابهة للي فاتت ، بيبقى عندنا بردو جهاز مفهوش زرار الـ WPS بس الجهاز نفسه بيدعمها ف الجهاز بيولدلك “client PIN” تقوم أنت تاخد الـ PIN دة و تدخله بردو Manually في صفحة الراوتر. 😀
= طب ما الزرار طلع ليه فايدة أهووو و الـ WPS طلعت بتسهل كتيير ، و أنا اللي كنت فاكرها ملهاش لازمة ! ???
– استنى بس خد رايح فين … ما أنت كل حاجة زي ما ليها ميزة بردو ليها عيب 😀
= ازاااااي يعني !!!!
– ما أنت الراوتر دة حتى لو مطلبتش منه انه يولدلك PIN Code هو كدة كدة هيولد تلقائي ، الراوتر بيولد الـ 8 أرقام دول و يخزنهم في جزئين منفصلين ، و بيعين في كل جزء منهم 4 أرقام من الـ 8 دول.
= طب فين المشكلة بردو هنا !
– المشكلة هنا أن الهاكر ممكن يقتحم الجزء الأول اللي فيه الـ 4 أرقام و بعدين يقتحم الجزء التاني و ياخد الـ 4 التانين و بكدة يكون معاه الـ PIN Code و يقدر يخش على الراوتر بتاعك و يبقى ليه Access زيه زيك 😀
= ااااااه ، فهمتك … تقصد أني كدة بمجرد ما بفعل الـ WPS دي … كدة انا بفعل نفطة ضعف في الراوتر بتاعي يقدر الهاكر يخشلي منها.
– بالظبط كدة .. الموضوع عامل زي لما تعمل باب خلفي لبيتكم عشان تخرج منه أسرع ، بس في نفس الوقت لازم تعمل اعتبار ان ممكن نفس الباب دة الحرامي يستخدمه عشان يسرق بيتكم 😀 ????
= طب و عملية الاختراق دي بتاخد قد ايه وقت كدة !
– بص … والله هو على حسب الموقع اللي أنا قاري منه الشرح دة و اللي هحطهولك في المصدر تحت ، بيقول ان الهاكر الكويس بياخد وقت في حدود من 4 : 10 ساعات 😀
= يا راااااجل … وقعت قلبي 😀 … كان يناديني يا عم و أديله أنا الـ Password أسهل من دة كله ???
– المهم بردو قبل ما أسيبك و أمشي ، نصيحتي ليك ، لو أنت مش بتستخدم الـ WPS زي ما شوفت فوق كدة ،

يفضل أنك تخش على اعدادات الراوتر بتاعك و تقفلها أحسن

 

wps
wps

قد يعجبك ايضا المزيد عن المؤلف

تعليقات

Loading...